Ruihhlo kan do tak tak em?
23 Sector Assam Rifles buatsaih, ruihhlo do rûnpui, ‘Anti Drugs Awareness Campaign’ chu tun hnai khan Deputy Chief Minister-in a khar a. Sorkar, Kohhran leh NGO hrang hrangte bakah Assam Rifles ten ṭhahnemngai taka ruihhlo dona kawnga hma an lakna chu ropui a tih thu a sawi a, mahni hma zawn ṭheuhah nasa zawka ruihhlo do a ngaih thu a sawi.
Tun hnaiah Mizoramah namen loin ruihhlo a hluar a, mi tam tak chuan Myanmar lam aṭangin Heroin a lo chhuk nasa a, state ṭhenawm aṭangin ruihna atana hman chi damdawi leh ganja-te a lo lut reng bawk niin an sawi. Hengte hi Mizorama a lo luh khawm chhan chu Mizoram hi an tan 'market' ṭha a nih vang a ni ber a, ruihhlo hralhna tur a awm miau avangin hralhna hmun tur an rawn pan khawm a, kan ṭhalaite'n an tuar mek a ni.
Ruihhlo ti lo tura kan inzirtir uar lehzual a ṭul a, chumi atan chuan zirna in leh biak-in lamah inzirtir uar a ṭul tih kan sawi a, ruihhlo dona kawnga pen chhuak turin kohhran lam phûtna pawh a sâng hle. Tunah chuan kum naupang zawk hnenah ruihhlo chungchang inzirtirna pawh uar taka kalpui a ni chho a, kohhran pawhin ruihhlo do kawngah ṭan a la mek a, a taka ruihhlo tirem tura beih lêt lamah hian kan muthlu deuh a ni lo maw?
Myanmar aṭanga lo lut tur hi kan dang seng lo a nih pawhin Aizawl khawpui lailia chhun en laia ruihhlo zuar leh a leitute zalen ta lutuk erawh ven harsa a nih hmel lo a. Hei em pawh kan veng thei lo a nih chuan ruihho hi a thuin kan do a, a takin kan do lo a ni mai lo maw?
Tun hma chuan ruihhlo ti ṭhin, a bikin inchiu ṭhinte chuan hmun biru thei ang ber an pan a, tunah chuan khawpui lunlaiah pawh tlanchhe loin an inchiu ngam ta a ni a, heng mite hian hlauh tur sorkar mi leh sa (Police leh Excise department lam) an hmu lo a ni thei em?
Heti tak maia ualaua ruihhlo tih ngamna khawpuia Aizawl a chhuah meklai hian khaw lian dangte leh thingtlang thlengin ruihhlo hian a chiah mek a ni. Ruihho ti turte inven a ṭha a, chutih rualin ruihhlo tirêm tura a taka chet chhuah hun a, heti taka zalen loa siam hi tunah hian a ṭul a ni.