Zu khapna hnuaiah Zu a zalen

Excise & Narcotics depart­ment leh Mizoram Police chuan May 2022 chhung khan MLP Act, 2019 hnuaiah zu zuar mi 403, zu rûi mi 80, rakzu litre 5,362.15 leh zu bilh lai ṭín 10,892 bakah sap zu um 5,000 chuang an man tih sorkar thuchhuahin a tarlang.

Mizoram sorkar hian zu khapna dan a kalpui mêk a, hei hian zawm a hlawh ṭha lo hi a pawi hle a ni. MNF party hian zu khapburna dan siam a tum thu hi kum 2018-a MLA inthlanpui neih hma khan a aupui tawh a, hei hi vote zawnna atan a hmang kher lo a nih pawhin mi tam takin an vote chhan a tling ngei ang.

Sorkarna an chan hnuah an intiam ang ngeiin zu khap burna dan chu a siam ta ngei a, mipui pawh an läwm hle niin a lang a; nimahsela dan siam a kalpui leh bawhzui danah erawh beisei a phak lo deuh.

Tunah hian Aizawl khawpui dai maiah 'zu hmun' tih theih khawpa zu tamna a la awm reng a, khawpui chhung hmun lunlaiah pawh 'standing' an tih mai zu zuar a kal kual an awm a, a sum nei deuh tán in lama zu lei theih, koh tur an awm reng bawk.

Zu hi a tlem ta sawt ni loin a zalen lo deuh a, a quali­ty a chhe sawt a, a man a to sawt ringawt a nih chuan a fuh lo hle ang. Zu kan khap a nih chuan tihrem tuma beih a ngai a, "A hmingin khap ila tihrem hi chu a theih tak tak loh," tih rilru pu loin, dan anga zu zawrh ringawt titawp loin dan loa zu zawrh titawp turin sorkar hi a ṭan lehzual a ngai a ni.