Ruihhlo tawlh leh inbumna

Tun hnaiah Bengaluru-ah ruihhlo (heroin) tawlh rûkna lian tak hmuh chhuah a ni a, Bengaluru-ah Mizo pasarih leh Rwanda-ah Mizo pathum man an ni. Bangalore Mizo Association (BMA) chuan, mihring inbumna leh ruihhloa sumdawnna avanga Bangalore-a thil duhawm lo tak a thleng chu pawi an tih thu sawiin, fimkhur turin Mizo mipui an chah.

Mizoram chhung mai ni lo ram pawn thlenga ruihhlo kaihhnawiha Mizo hming lo lang hi a pawiin a van­duaithlak takzet a, tun hi a vawikhatna mai a ni lo a, thil lo thleng fo tawh ṭhin a nih avangin a vanduaithlak lehzual a ni. He mi kawngah hian mi bumtu leh a bul ṭantute hi an demawm takzet a,, chutih rualin awlsam taka sum siamna (easy money) tur a awma kan chik lo ṭhin leh zir chiang phal loa kan bawh huam huam ṭhin hi a pawi hle a ni.

Myanmar leh state pawn aṭanga ruihhlo lo lutin kan thalaite a tibuaiin harsatna lian tak a thlen tih kan hria a, a ram pumin kan buai mêk a ni. Chutihlaia kan state pawn leh ram pawn thlenga ruihhlo tawlh rûk thila Mizo hming a lang zauh zauh ṭhin hi a pawi takzet a ni.

Nu leh pate pawhin kan fate state pawna awm hi eng hna nge an thawh tihte chik peih ila, an sum hman dan leh an khaw­sak danah an thawh chhuah pang­ngai baka sanga an khawsa a nih chuan ringhlel 'phal' ila, sum lak­luh­na dik loah an lo inhnamhnawih ve a nih pawhin kan chik peih chuan a pawi thui hmain an chhanchhuah theih ang.

Ruihhlo a ni emaw, sum thianghlim lo leh smuggling kaihhnawihah Mizo hming a lang fo hi a mualphothlak a, a pawi takzet a ni.