Tui bill tihpun leh sorkar thil sem

PHE department enkawltu Deputy Chief Minister chuan tui bill chu ennawn a hun tawh tih sawiin, tui bill tuna kan hman mek hi kum 11 chuang kan hmang tawh a, Tlawng tui pump leh sem nan department-in tui litre khat zelah pawisa 3 a nih thu sawiin, "Thil man sang zel ngaihtuahin leh department pawh sum thawk chhuak tura revenue target-te tuk an nih ṭhin angin tui bill ennawn a hun ve tawh hle a, kan tihmâkmawh a ni," a ti.

Tuna tui bill hman mêk hi kum 11 kal taa a man bithliah tawh a nih vanga tihsan ṭul tawha kan hotuten an ngai ringawt mai hi chu a sumdawng rilru hle mai a. Mipui tana ṭang thei tur khawpin kan sorkarin sum hai luhna a ngaihtuah loh avangin mipui chu chhiah leh bill hmanga sorkar sum tur thawh khawmtu angin an ngai a ang ta hle.

Sorkar hian sum a ma­mawhin mipui aṭangin a remchan angin a khawn tur a ni ngei a, chutihlai mêk chuan sorkar ṭhenkhat chuan tui bill leh electric bill-a mipui chhawk zangkhai dan an duang chhuak thung a, keini lam chuan, "Tihsan a hun ve tawh alawm," kan ti a ang ber.

Tui bill tihpun hrim hrim hi a punna zat azirin mipui pawhin thui tak chu an hrethiam theiin a rinawm a; mipui hriatthiam theih loh erawh chu he sorkar tho hi a duhna kawnga sum nei ber anga a kal leh a sema sem tur hial pawh nei anga a awm hi a ni awm e.

A thlawna sem tur lama pawisa nei thei siin tui bill tihsan an rawt a, a sawi mawinaa "Kum 11 a ni tawh," tih leh, "Thil man a sâng zel," tih ringawt hi chu a fuh tawk lo. Sorkarin mipui tana tui a pek hi a 'service' angah chhiar se, litre khatah pawisa 3 a seng a nih pawhin a mipuite rual khai takin tui a 'sem' angin pawm se, thil dang rual khai lo taka sem a tum lamah insum se mipui an dam deuh mahna?