Kawngpui siamtute leh an hnuhma

Tun hnai khan Youth for Environment Justice Mizoram, Lunglei Ṭhalai Pawl, Serchhip Ṭhalai Pawl, Hnahthial Ṭhalai Pawl leh Saikhawpui Ṭhalai Pawlte chuan Chief Minister hnenah lehkha thehlutin Natio­nal Highway and Infrastructure Development Corporation Limited (NHIDCL) hnuaia kawngpui laihin environment a tihchhiat nasat lutuk tihtawp a nih theih nan hma la turin an ngen a. Chumi hnuah NHIDCL office bulah lungawilohna an lantir bawk.

Kan ramah kawng­pui ṭha tak tur chu sorkar laipui tha chakna hmangin sial mêk a ni a, a lawm­awm tehlul nen an kawngpui laihna leivung paih duhdah avangin min tibuai hle. Heng kawngpui laihna leivungte hi duh duhna hmuna paih mai tur a ni lo a, a paihna tur hmun bika paih bakah a sawngbawl dan tur awm thlap a ni; tunah hi chuan a remchang lai laiah an nawr liam a ni ber.

NHIDCL leh an hnuaia contractor-te'n an duh thala leivung an suasam kan phalsak ta mai nia lang hi kan ṭhanharh a ṭul a, mi ṭhahnemngaite hmalak­na hi a tam thei angin thlawp a, ṭan tlan a hun takzet a ni.

Mahni ram pawh humhalh nachang hre lo anga kan lan lohna turin tun hi thawh chhuah hun a ni a, 'ram leh hnam humhalh' kan tihte pawh hi tun hi a hman hun a ni ngei ang.

Leivung paih hian kan lui a tibawlh­hlawhin nungcha tam takin an thih phah a, thing leh mau nasa takin a tichhia. Hmun tam takah kawr a hnawhin tui a khúap a, lui luang a tibuai. Hei hi kan ram hruaitute hian an vei a ngai takzet a ni.

Kan ram neih chhun 'hma­sawnna' hming hawha an suasam ta vak mai hi ngawi rengin en liam mai lo ila, a chhiat belh zel lohna turin ven theih tam tak a la awm e. Tun hmaa kawngpui an laih pawhin tun ang hian duhdah takin leivung an paih lo; sorkar leh tlawmngai pawl liante hian ram tán aw chhuah ngei rawh se.