Silchar-in kan ṭanpuina an mamawh

Silchar leh a chhehvela tuilian tuarte ṭanpui nan Central YMA chuan tun hnai khan tui thianghlim litre ṭhahnem tak Silchar-ah a thawn.

Silchar tuilian hi a nasa hle mai a, ni eng emaw zat chu an khawlai leh in tam tak tuiin a chim tawh a ni ber mai a, nunphung pangngaia nung leh thei tur chuan hun a la duh rei deuh dâwn a nih hmel.

Electric power supply a buai a, internet thlengin a buai phah a, ei leh inah harsatna an tawh bakah sahimna zawngin chhungkaw tam tak an inthiar chhuah a ṭul phah a ni.

Hetihlaia ṭanpui ngaite ṭanpui thei zawk dinhmuna kan awm hi a lawmawm hle mai a, kan ṭhenawmah puih ngai an awm a, Mizo kan nih avangin puih ngai chu kan pui mai tur a ni a, hnam leh chi thliar loa puih hi kan tih tur dik tak a ni.

Hetihlai hian mi ṭhenkhatin tun hnaia Assam nen ramri buai kan neih dante leh kan ei leh in lakna kawng an khar fo thute thehdarhin thil ṭha tih hi ṭul lo ang lek leka sawi hnawm an awm a; ramria police duty-te pawh tui in tur thianghlim pe thei loa peka hneka an dinhmun puangtu police suspend a nih thute sawi chhuah a ni.

Heng zawng zawng hi kawng lehlama ṭhahnem­ngaihna ni bawk mah se, ṭanpui ngaite puih ṭhulh phahna atan chuan hman loh a ṭha ang.

Kan ṭhenawma kan châk­khai lakluhna khaw lian zinga a hnai ber leh pi leh pute hun aṭanga kan mamawh lam khawmna khuain chhiat an tawk a, Mizo mipuiin kan pui hi kan nihna nen pawh a inhmeh hle a ni.