Pawisa hmuh loh leh hmuh sa hmanna
Chief Minister leh MNF President ni bawk chuan hripui leng avangin Mizoramin sorkar laipui aṭangin cheng vaibelchhe 3,000 vel an hmuh loh thu a sawi a, budget-a ziah luh angin pawisa hmu kim se harsatna engmah a awm loh tur thu a sawi.
Mizoram sorkara Finance department enkawltu ni bawk thu sawi hi a dik a nih chuan Mizoramin cheng vaibelchhe 3,000 zet kan dawn tur ang kan dawng lo hi a uiawm tham hle mai. Pawisa heti zat dawng lo chunga kan kal thei erawh thil lawmawm tak a ni.
2021-22 chhunga Mizoram budget chu cheng vaibelchhe 11,48.89 a ni a, heta ṭanga vaibelchhe 3,000 zet kan hmuh loh chuan kan pawisa dawn tura 26% vel zet kan hmu lo tihna a ni. Hetiang zat sum hmuh tur kan hmu lo chunga kan pawisa dawn ang ang hmanga kan kal hram hram thei erawh a lawmawm hle a ni.
Kan pawisa dawn tur kan dawn loh hi a tam tehlul nen kan hman dan en hian kan mamawh lutuk ni lem lo 'construction' lama kan kal na lutuk erawh a chhan mipui min hrilhfiah thei se. Zirna, hriselna, eizawnna bul ṭanna leh sorkar hna siamna lam hawia pawisa kan neih mang lohlaia kan neih sa kan hmannate hi en uluk deuh chu a ṭha khawp mai.
Sorkar laipui aṭanga pawisa dawn kan tihte pawh hi a zavaia a thlawna dawn liau liau (100% funding) hi chu a awm tawh meuh lo a, state-in kan tum ve tur (state maching share) a awm zel avangin kan sorkar hian sum a seng ve zel a, kan sum hmannate hi kan mamawh ber ber a ni em?