Remna ni leh Mizote

June 30, 1986 khan India sorkar leh Mizo National Front chuan Mizoram Peace Accord, 1986 ziakin remna a lo thleng ta a, hei hi 'Remna Ni' tia vuahin Mizote tana ni chhinchhiahtlak ber zinga mi a ni.

MNF aiawhin Laldenga'n hming a ziak a, India sor­kar aiawhin Home secretary RD Pra­dhan chuan hming ziakin Mizo­ram aiawha hming ziaktu chu Lalkhama, chief secretary a ni.

He ni hi ni pawi­mawh leh hlimna ni a ni a, ram buai avanga hun thim leh hrehawm tak tuar tawh Mizote'n remna a thleng ta an lawm avangin an lam tlaivar hial a ni. Hun a kal zel a, politics thil avangin he ni kan thlir dan leh kan sawi duh dan a danglam chho ta zel erawh a pawi hle a ni.

Politics a nih tawh chuan thil kan sawi duh dan hi a dang thei hle mai a, ṭhenkhat tana ni ropui hi ṭhenkhat chuan 'Mizo hnam tlawmna ni' tite hialin an han sawi duh a, a ngaihlutu lam tan chuan hriat a hrehawm hle ang. Hetihlai hian he ni avanga Mizoram inthlak danglamzia leh remna thlen hma leh remna thlen hnu nun danglam dante chu a taka tawngtute hi a hre chiangtu kan ni.

Engpawhnse he ni hlu tak mai hi Mizote hian tun ai hian ngai hlu zual ila. Political party tan pawh mahni hamṭhatna zawn ni emaw midangte sawi chhiat ni-ah emaw chhuah tawh lo ila, remna ni hi ṭhang­tharte pawhin tun aiin dah pawimawh thiam zel se a lawmawm ngawt ang.