Hripui a la reh fel lo e
Covid-19 chungchanga Mizoram sorkar thupuangtu, IDSP State Nodal Officer chuan, tun hnaiah Covid-19 a hluar leh deuh avangin mipuite'n fimkhurna nunpui thar leh se a duh thu a sawi a; Mizoramah hripui kai hmuh chhuah thar a pung leh mêk.
Mizoram hi India rama hripui laka inveng rei ber pawl kan ni hial ang a, chutih rualin a tihbuai rei ber pawl kan ni tel bawk.
State tam takin hripui laka invenna an thlahdul hnuah pawh a kengkawh rei ber zinga mi kan ni a, Aizawl khawpui phei chu India rama zan curfew neih reina ber a ni hial ang.
Tunah hripui a lêng thar leh mêk tih leh symptom nei na tak tak hmuh an awm leh ṭan ta tih hriat a ni leh ta hi a pawi hle mai a, inven a la awlsam lai hian inzirtirna hi uar zawka kalpui leh a ngai a ni.
Thil a buai tawh hnuah chuan eng ang pawhin inveng mah ila a sawt vak lo tih hre chiangtu chu Mizoram mipui leh sorkar hi kan ni. Chuvangin kan dinhmun a ziaawm lai hian kan invenna lam kan uluk thar leh a pawimawh hle a ni.
Hetihlai hian mipuiah hripui hlauhna a tlakhniam tawh avang leh loh theih lohna avanga kan hna pangngai ṭheuh kan thawh a ṭul si avangin sorkar tán pawh inven dan thiam a harsa tawh dâwn a ni.
Mipuiten a inven dan kan hriat tawh ṭheuh hi ṭha takin hmang chhunzawm leh ila, sorkar thuneitute vensak ngai loa mahni ṭheuh inven thiam a pawimawh ta hle a ni.