Kuhva hal thu kal zel

Taitesena Group YMA leh Kawrthah Joint Village Council chuan dan loa Myanmar aṭanga kuhva lak luh donaa Hachhek Bial Kuhva Chingtu pawl (HBKCP) hmalakna leh Zamuanga kuhva rah man hal a ni thu an thlawp thu an chhuah.

Tun hnaiah Zamuangah kuhva rah ip 285 chu mi tu tih hriat lohten an hal a, he kuhva hi Myanmar aṭanga dan loa lakluh ni ngeiin an hria.

HBKCP chuan report an dawn bawhzuiin Vaireng­te kudama Myanmar kuhva tawlh ruk an dah chu an phur chhuak tih an hria a, zan lai pelh thlenga an chân hnuah an man a, he mi tukah hian hal a ni.

He thila lo lang chiang tak mai chu kuhva rah tawlh rutu lam hian ruahmanna ṭha tak nen phurh chhuah an tum tih a ni a, dan loa kuhva tawlh rutute hian ṭantu ṭha tak an nei nia rinhlelhna a lian zui zel.

He Kuhva an phurh chhuah hi kuhva tawlh ruk tuartu HBKCP chuan hriain an man ta a, hetianga hma an la hi anni tan chuan eizawnna tichhetu a nih bakah dan loa chete dodalna a ni tel bawk.

YMA leh VC intel­khawmin ualau taka kuhva rah hal an thlawp tawh a nih chuan eizawnna thilah chuan miin a ngam huai hle tawh tih a chiang a ni.

Dan loa kuhva tawlh rutute lakah rim taka thawktu kuhva chingtu kuthnathawktute hi chhan an ngai a, sorkar hian an thlavang hauhin kuhva rah tawlh ruk hi titawp se a lawmawm ang.