Hman khat daih sarang khapna
July 1, 2022 aṭang khan Mizoram pumah Plastic Waste Management (Ammendment) Rules, 2021 hmangin hman khat daih sang (single use plastic) khap a ni a, dan bawhchhiate chu Plastic Waste Management Rules hmangin hrem theih an ni.
Sorkar laipui rawtna anga Mizoram sorkarin hman khat daih sarang a khap hma pawh hian Aizawl Municipal Corporation (AMC) chuan micron 50 aia pan sarang khapna thupek chu kum 2019 aṭang khan a lo chhuah tawh a; kum 2021 khan Plastic Waste Management (Amendment) Rules siamin sarang micron 75 aia pan hman, kawl leh zawrh a lo khap tawh a, dan bawhchhiate hremna tur pawh ruahman a ni.
Khawvel ṭhang zelah awlsamna kan um luatah kan ram sik leh sa, boruak leh lui tuite thlengin a lo danglam nasa ta a, mihring nawmsakna kan um avangin kan environment kan tichhe zel a ni ber mai. Heng zingah hian plastic hman uar avanga harsatna thleng a tam hle a, hei hi khap a hunin a ram pum huapa hmalakna hi awm lo pawh ni se Mizoram chhung chauh pawha khapna hi hman chi hial a ni zawk.
Tunah chuan sorkar laipui, state sorkar leh AMC lamin dan hrang hrang tlawhchhanin hman khat daih sarang khapna thu a chhuah ta a. Heti chunga hmang leh zuar lui an la awm a nih chuan thuneitu lamin dan anga an hrem zel a ṭha ang.
Thuchhuah siam te, dan siamte hi chu thil theih a ni a, a taka kenkawh hi a harsat ṭhin avangin he dan siam tharah hi chuan thuneitu lam hi ṭang mar ṭha se, kan ṭan rual chuan hman khat daih sarang tel lo pawhin kan khawsa thei ngei ang.