Lui humhalh leh kan nunphung

Central YMA leh PHE depart­ment ṭangkawp chuan tun hnai khan 'Tlawng lui fintu lui ṭhenfai hnatlang pui' an huaihawt a, mi 1,800 chuang an thawk chhuak. Tlawng lui fintu lui hrang hranga bawlhhlawhte then fai a ni a, thing ṭiak 250 an phun bawk.

Tun hnaiah kan ramah lui humhalh duhna te, kan tui hna kang mai tur humhalh duhna te, kan ram leilung bakah thing leh mau humhalh duhna a lian sawt hle a, thil lawmawm tak a ni.

Mahni ram pawh humhalh nachang hre mang loin kan awm rei hle a, tunah hian tlai tawh deuh mah se kan ṭhangharh mêk hi thil lawmawm tak a ni.

Hetihlai hian lui humhalh leh tihfai hi vawi khat hnatlanga thawh zawh mai chi a ni lo a, nun dan phunga kan neih loh chuan kan luite hi a la bawlhhlawh zual zel dawn. A hnar a kang chatin kan sik leh sâ a danglam ang a, khaw lum leh ro takah kan ram hi a chhuak palh ang tih a hlauhawm ta hial a ni.

Kan bawlhhlawh leh leivung paih dan te hi tihdanglam a ngai a, dan bawh­chhetute pawh hrem loa kan hotu­ten an 'titipui' zel ringawt chuan dan bawhchhiat hi thil hlauhawm loah kan ngai mai palh thei a ni. Kan ram tichereutu leh tibawlhhlawhute chungah kan thikthu a chhiat a ngai a ni.

Tui fim leh thiang­hlim nei tur chuan thianghlim duhna rilru nen nunphung kan thlak a ngai a, kan zavaiin i ṭang thar ang u.