Naupang aṭanga inzirtir

Mizoram Social Defence & Rehabilitation Board (MSDR B) leh SCERT-te chuan 'Training of master trainers for drug prevention in schools' an buat­saih a. He huna tarlan a nih danin Social Welfare & Tribal Affairs department hnuaia MSDRB hmalaknaa naupang kum 18 hnuai lam zirchianna, 'Study on Drug use amongst children between 10 to 17 years in Mizoram 2022' hmuh danin, kum 5 liam ta aiin tun dinhmunah naupang ruihhlo ti an tam a, ruihhlo an tih ṭan kum pawh a naupang telh telh a ni.

Mizoramah ruihhlo a hluar thu kan sawi ṭhin a, ruihhlo ti ṭhinte kan ngaihtuah hian 'misual' leh khawia mite emaw nia ngaihdan lian tak a awm mai thei a, tuna kan dinhmun thlir hi chuan kan zinga mite ngei, kan fate hi ruihhlo ti thar an lo ni reng thei.

Kan ram dinhmun thlir hian ruihhlo ti ṭhin an pung mai ni loa ruihhlo ti ṭhin te pawh tun hmaa ruihhlo ti ṭhinte aia naupang zawk an ni tlat mai hian ngaih a ti ṭha lo zual hle a ni.

Ruihhloin min rûn dan hi a thuk tawlh tawlh a, kan inveng ṭha lo a nih chuan kan rin loh hlan hian insiam ṭhat harsa khawpin kan chhe hman ang tih a hlauhawm takzet a ni.

Sikulah naupang aṭanga nasa zawka inzirtir a ngai a, Sunday School leh inkhawmna hmun dangah pawh uar zawka kan inzirtir a ṭul. A pawimawh ber erawh chu mahni chhungkua ṭheuha inzirtir a ni a, chhungkuaah bawk kan kir leh a ṭul a ni.