Flyover siam tur hi

Aizawl khawpuia Bawng­kawn leh Vaivakawna flyover siam tuma ruahmanna kal mekah tun hnai khan Mizoram sorkar leh Telecommunications Consultants India Ltd. (TCIL) ten thawhhona thu­thlung (memorandum of under­standing) an ziak.

Flyover siam tura ruahmanna awm­ah hian TCIL hian project siamin a pawisa tur an zawng ang a, an hlawh tur insiam nghalin a hlawhtling ta lo palh a nih pawhin Mizoram sorkar tan pawisa chawina tur a awm dawn lo a ni.

Aizawl khawpuiah lirthei a tawt em em a, traffic jam-ah hun leh tha bakah sum tam tak kan hloh a, khawpuia chengte nunphung a tibuai hle a ni. Traffic jam tihziaawmna tur hian kawng pawimawh pahnihah flyover (lei) siam a ni dâwn a, hei hi a hlawhtlin chuan traffic jam nasa takin a tiziaawm thei ngei ang.

Hetihlai hian Chief Minister-in a sawi ṭhin kawng chhawng (elevated highway) zawk kha sawi thawm a awm leh ta lo hle mai a, kan Chief Minister sawi anga kawng chhawng hi siam theih a nih tak tak chuan thil lawm­awm tak a ni ang.

Kawng pawi­mawh pahnih khata flyover siam tumna a awm ringawt pawh hi thil lawmawm a ni a, khawpui kawng dungah hian kawng chhawng tak tak siam a nih theih chuan a lawmawm dâwn hle a ni.

Sorkarin thawh­pui neia flyover siam tuma ruahmanna a siam hi hlawhtling ngei se. Chief Minister aupui ber ṭhin kawng chhawng siam turah pawh ruahmanna awm thuai se a lawmawm lehzual ang.