Mamawhna hmunah cold storage

Mamit viltu Central Prabhari Officer for Aspirational District Umakant chuan, tun hnai khan Mamit district-a Dárlâk leh Bâwngvâ khua a tlawh a, Bawngvaah hian thlai thar dahṭhatna tur cold storage ngaih­tuah a nih dawn thu a sawi.

Mizorama kut­hnathawktute harsatna tawh lian tak pakhat chu an thlai thar vawn­ṭhatna awm lo hi a ni. Thlai tharte chu tihralna an hmuh loh chuan a chhe hman ṭhin a, a chhiat hmaa hralh a ṭul avangin hmanhmawh takin a hralhna an zawn a ngai ta ṭhin a. Hnawhsarum taka hralh a ngaih fo avang hian kuthnathawktute hian an hah man an hmù lo fo ṭhin.

A kharchhawngtu bazar lama hralh thei zawk leh hralh thiam zawkin an leisak a, a taka thawktu aiin mipui hnena zuar chhawngtu lam an hlawk fo chhan pakhat pawh a dah dah ṭhatna a awm loh vang a ni.

Kuthnathawktute thar chhuah thlai leh theite dah ṭhatna bakah ran vulhtute tán sa dah ṭhatna a ṭul em em a, sangha khawitute pawhin an sangha vawn ṭhatna an mamawh hle a ni.

Tun hma pawh­in hmun hrang hrangah cold storage hi din a lo ni tawh ṭhin a, nimah­sela a din dan leh a enkawl zui danin a zir lo pawh a ni ang a, kan mamawh tak nia kan sawi hi kan tiṭawl leh mai ṭhin a ni.

Sorkar laipui a ni emaw, state sorkar leh pawl ang pawhin cold storage leh thil dang kan tih dawnin a hmun hi thlan uluk ni ṭhin tawh se. Mamawhtuten an chhawr theih ngeina hmuna din te, thil phurh luh leh phurh chhuahna remchang mil tura siam te leh power supply a ṭhatna tur thlenga thlir thiam a pawimawh hle ang.