Grape wine leh sorkar

Excise and Narcotics department (END) chuan May 27, 2022-a Aizawla grape wine eng emaw zat an mansak neitute lakah thubuai an ziak lut a, pawisa chawitir an ni bawk.

Mizoram sorkar hian grape wine chungchangah hian dinna fel tak a nei lo niin a lang a, a zuartute zawrhlai mansakin thubuai a siamsak a, pawisa a chawitir.

Hetihlai mek hian Champhai district lama grape wine siamna hmunpuiah (winery) chuan wine siam mek zel a ni a, hei hi sorkar pawhin a hria. Chutihlaiin an man lo a, pawisa an chawitir lem lo bawk niin a lang.

May 27, 2022-a Aizawla grape wine man chungchangah END minister chuan, grape wine mantu Excise enforcement staff-te chu grape wine man tura kal an nih loh thu June 3, 2022 khan a lo sawi tawh. Heng END mi leh sate hian a tirah zu an man angin an sawi a, Millennium Centre Dawrkai Association (MCDA) chuan, Millennium Centre-ah zu man tel a nih loh thu an tarlang a, zu man anga tarlan hi thu belhchian dawl lo a ang ta hle.

MCDA hian Millennium Centre-a wine mante chu a neitute hnenah pe lêt tur leh an pe lêt lo a nih chuan zangna­dawmna pe turin Mizoram sorkar an lo phût tawh a, Mizoram sorkar hian an pe let lo mai a ni lo; thubuai an siamsak bakah pawisa an chawitir.

Hetihlai mek hian Champhai District lama ruling party MLA chuan June 10, 2022 khan Hnam Runa a thu­sawinaah grape chingtute hmaah sorkar a ding zel dawn tiin thlaphang lo turin a chah ve thung.

Grape wine chung­changah hian sor­kar hian dinna mumal tak a nei lo a ang ta ber mai. A chang leh a man a, a chang leh wine siamtu lam thlavang a hauh a, a chang leh grape chingtute tana an din tlat thu an sawi ang lawi si.

Sorkar hian dinna chiang tak nei ngam se, dinna nghet pawh nei loa thle tawn vel mai mai lo hian sorkar chu sorkar angin che ngam se. Mipui pawhin tunah hian sorkarin grape wine chungchanga a ngaihdan hi an la hrethiam lo ang.