Lockdown leh mipui

Coronavirus leng mek avangin Mizoram sorkar chuan March 22 - 29, 2020 chhung chu Mizoram pumah lockdown a puang a, mipuite chu ṭul bik thilah lo chuan mahni chenna in chhuahsan lo tura ngen leh hriattir an ni. 

Mizoram sor­karin lockdown a puan chhungah hian March 22 (Pathianni) kha Prime Minister-in 'mipui curfew' a puang bawk a, he curfew hi zing dar 7 aṭanga zan dar 9 thleng a ni. Zan dar 9 a pelh khan mi ṭhenkhat chu lockdown puan a ni tih hre lo ang maiin pawnah an chhuak a, an tei huai huai tih report a awm a, a zialo hle a ni. 

Sorkar-in curfew a puan a awm a, eng pawlin emaw total bandh a awm a, tuna lockdown nen hi chuan thil inang lo deuh a ni. Tunah hi chuan sorkar pisa pawimawh zualte a la kal reng a, bank a la inhawng a, mipui mamawh zual bik zawrhna a inkhar lo bawk. Hei vang hian mipuite zalen taka chhuah theih tihna a ni lo a, curfew leh total bandh ang lo taka duty an tlem deuh avanga zalen ta emaw inti an awm hi a pawi hle. 

Coronavirus avanga sorkarin lockdown a puan hi kan zavaia himna tur a ni a, inkhuahkhirhna leh tihluihnaa inkhung anga ngaih tur a ni lo. Chutianga ngaite chuan a vengtu an awm leh awm loh bihthlain chhuah ruk dan phêt an ngaihtuah a, chutihlaiin mi chinchang hriate chuan kan zavaia himna tur a nih hriain theihtawp chhuahin sorkar an thlawp thung. 

Tun hi ṭan rual hun a ni a, Mizoram chhunga cheng zawng zawngten lockdown hi ṭha takin i thlawp tlat ang u.