Sorkar leh dan loa kuhva sumdawnna

Hachhek Constituency Development Committee (HCDC) chuan, dan loa Myanmar aṭanga lak luh kuhva rah hmanga sumdawnna kalpuitute leh an thurualpuite zawng zawng a rang thei ang bera man tur leh an phû tâwka hrem turin Mizoram sorkar an ngen.

HCDC chuan, Hachhek Bial Kuhva Chingtu Pawl (HBKCP)-in June 6, 2022-ah Chief Minister hnenah June thla chhung ngeia dan loa kuhva sumdawnna kal­puitute man tur leh hrem tura ngenna an thlen tawh chunga Mizoram sorkarin hma a la lo chu hriatthiam harsa an tih thu an sawi a. A sorkar zawk hi dan loa sumdawngte thurualpui ang hiala an rinhlelh tawh thu sawiin, "Kan sorkar hian dan loa sumdawnna kalpuitute a thurualpui lo a nih chuan dan loa sumdawnna kalpuitute leh an thurualpuite zawng zawng a rang thei ang bera man chhuak a, an phú tâwk hremna pe ngei turin sorkar kan ngen tak meuh. Kan bial chhung hi dan loa kuhva tawlhna kawnga hman kan phal lo tih min hriatsak turin kan ngen bawk," an ti.

Kuhva tawlh rutute hian dan loin sum an siam a ni mai lo a, dan loa an thil tih hian Mamit leh Kolasib district lama kuhva huan siama eizawngtute eizawnna a tibuai hle a ni. Mahni khúa leh tuite'n smuggler-te avanga harsatna an tawh laia a sorkar berin hmalakna mumal tak a nei ngam lo ang maia lang hi a Vanduaithlak takzet a ni.

Kuhva smuggling lamah hian khaw chhak lama mi hausa tak tak an inrawlh tih chu phat rual a ni lo. Anni bakah hian sorkara thiltithei deuh deuhte an inrawlh nia rinhlelhna hi mipuiah a lian hle tawh a, HCDC phei chuan a sorkar zawk hi rinhlelhawm ang hiala ngaih theih turin thu an chhuah ta hial a ni.

Kuhva smuggler-te avanga kuhva huan siamtu kuthna­thawktute harsatna tawh ching fel theitu sorkar kan mamawh a, heti a nih loh chuan boruak chhe zawk a thleng palh ang tih a hlauhawm ta hial a ni.