Local Level Task Force

Coronavirus hripui lêng mêk laka Mizoram a him theihna tur leh, he hripuiin Mizoram a lo lut ve palh a nih pawha mahni khawtlanga hnathawk thei tura din Local Level Task Force-te chuan Mizoram hmun hrang hrangah chhun zan zawmin hna an thawk. 

State dangte laka Mizoram a danglamna ṭhin chu khawtlang inrelbawlna ṭha tak kan nei hi a ni a, khawtlangin a ma­mawh huna che chhuak thei, hlawh nei loa vantlang tana thawh inhuam kan nei ṭhin hi a ni. Hei hian kan khawtlang a tinuamin a tithlamuang a, tuna Covid-19 hri lêng vêl karah pawh Local Level Task Force-te hi an ṭangkai hle. 

Hetihlai hian kan khawtlang ṭheuh a inang lo ang bawkin kan hnathawh dante pawh a inang lo a, rin phak baka hnathawk ṭhaa khawtlang enkawl kawnga khauh em em mai an awm rualin, inthlahdul deuh pawl an awm ve bawk. 

Engpawhnise training fel takte neia kalphung mumal tak nena din hman a ni lo a, hri lêng khuahkhirh tura mamawhna avanga Local Level Task Force hi din a ni. Tunah chuan an tel loa hnathawh theih a ni lo tih a chiang tawh a, sorkar mi leh sate thlen phak lohna leh kal remchan lohna thlengin an kal zung zung thei a, ramri ven kawngah an thawh hlawk a, inkhung hrang tura tihte enthlak leh vil zui kawngah pawh an ṭangkai takzet a ni. 

Hei vang hian sorkar pawhin Local Level Task Force-te tán a remchang ang ang dap khawm pawha sum a dah a ngai tawh a, hun pangngai anga thil tifel thlip thlepa tihna hun pawh a awm tawh vak lo a, Local Level Task Force puihna tur sum theh chhuak tur hian sorkar hi hmanhmawh rawh se.