Thing phun ven runpui neih ni tel se

Environment, Forest and Climate Change department buatsaihin India-in zalenna a neih kum 75-na lawmna atan hmun 75-ah thing phun runpui an buatsaih a, district khawpui tinah City Forest Project nei turin hma an la mek bawk.

Mizoramah hian kan lo neih danin a zir loh avangin kum tin mai kan thing leh mau kan vatin kan hal ral zo a. Tlang ram lo neih thlakna kan la hriat si loh avangin loh theih lohin kan ram ngaw hi keimahni ngeiin kan suat kum tin a ni.

Hei vang hian thing phun belh hi kan mamawh takzet a, tun ang zela kan kal chuan kan rama thing leh mau a chereu piah lamah tui hna a kang chat zo ang a, kan lui tuite pawh a kam zo ang tih hlauhawm tak a ni ta. Hetih kara sorkarin thing phun runpui a buatsaih hi a lawmawm a, hei hian rah ṭha tak a chhuah ngei ang tih a rin theih.

Kum tina kan thing kih leh hal ral zat phun ziah tur ni ta ila a huphurhawm hle dawn a, thing ṭhan len chhung rei dan nena chhut phei chuan thil tih theih loh tawp a ni dawn tih a chiang. Hei hian thing phun kan mamawhzia a tichiang awm e.

Thing phun a pawimawh rual chaih hian a enkawl zui lam hi kan uluk a ngai hle mai a, tun aia ṭha zawka vilin kan thing phun sa venhim beihpui pawh thlak thei ila a lawmawm hle ang.