Aizawl khawpui enkawl a ngai

Coronovirus hri leng avangin khawvel pum a buai mek a, Mizoramah pawh he ri vei hi an awm tih finfiah a ni tawh. Hetihlai hian Aizawlah DC, Aizawl Municipal Coporation (AMC) leh Covid-19 atana din Local Level Task Force-te'n an theihna zawn zawnah ṭan an la ṭheuh a; ei leh in tur la khawm tura chhuak traffic ti-jam khawp an la awm. 

Hripui a leng a, sorkarin theihtawp chhuah mah se a indaih loin a buai a, chutihlaiin tual­chhung bik enkawl turin Task Force ṭha tak din a ni. Hetihlai hian Task Force member-te hi inzirna pawh nei lo, hlawh pawh nei loa an khawtlang humhim tura pen chhuak an ni a, anni lamin dan an kenkawh duh dan te, AMC lam thuchhuahte leh DC lam thupek chhuahte a ṭang rual tawk lo deuh. 

Hetiang hun hi sorkar indem leh sawisel hun pawh ni lo mah se, tun hnaia Aizawl khawpui awm dan en hi chuan thuneitu chak takin awmze nei taka a kaihhruai ngei chu a ngai. Task Force-te chet dan hmun ṭhenkhat an duhkhawp lo a, hmun ṭhenkhatah an che uchuak hial emaw tih tur a ni. AMC-in chawpchilh takin dawr hawn leh khar hun an lo siam nen, inkhung tura kan inzirtir laiin khawlaiah kan tei ta huai huai a ni ber. 

Ni 21 chhung inkhung a ṭul vanga ei tur lam khawm mipuite hi dem theih an ni lo a, damkhawchhuahna (survival) thil a nih avangin hun remchang an chuh a ni. Chutih rualin a loa kan awm theih loh thil (essential commodity) zawrhna bik hawn hun hian mipui punkhawmna rem­chang a siam a ni ve thei a, helai hi thiam taka ngaihtuah a ngai a ni. 

Engpawhnise Chief Secretary aṭangin emaw, AMC lam emaw, DC pawh ni se, khawi aṭang ber hian emaw Cobid-19 len chhunga khawpui mipuite zawm tlan theih thuchhuak rin ber tur siam a ngai a, sorkar hi sorkar a nih ngam a ngai a, kan zavaia ṭhat tlanna turin a kal deuh hrâwk a ngai ta niin a lang.