Hripui a la reh lo
July 10, 2022 khan Mizoramah Covid-19 vei mi 87 hmuh chhuah a ni; sample 177 endik aṭanga positive hmuh zat 87 hi 49.15% a tling a, Covid-19 lèn tirh aṭanga Mizorama positivity rate sàn ber ní a ni.
Hripui dinhmun thlir hian tun hmaa hripui chin kan hriat chian hmaa kan hlauh em em hunlai ai khan kan dinhmun hi a ṭha lo zawk a; nimahsela hripui hlauhawm dan chin leh a hlauhawm loh dante kan hriatthiam tawh avangin mipui pawhin kan dawngsawng thiam ta niin a ngaih theih.
Hetihlai hian he hripui hi India ramah pawh mi nuai 6 chuangin an thihpui tawh avangin ngaihthah ngawt chi a la ni lo a, mithiamten inven dan min zirtirte ṭha taka zawm chungin he hripui hi kan hmachhawn a ṭul ta a ni.
Hripui avanga hna ṭhulh te, kan tih tur pawimawh ti thei loa insiamte hi thil ṭul ber a ni tawh lo ang a, mahni ṭheuh inveng chungin kan tana chhia leh ṭha kan hriat hran tawh avangin kan tih tur pawimawhte ṭhulh phahna atan hmang tawh lo ila. Chuti chung chuan fimkhur takin he hripui leng mêk hnuaiah hian awm dan i zir ang u.