UPSC, MYC leh Mizo zirlaite

Mizoram Youth Commi­ssion (MYC) in Super IAS 40 prog­­ramme hnuaia full scho­larship-a Delhi-a IAS coaching kal tur a thlante chuan thutiam an ziak a; thutiamah hian UPSC exam ṭum thum tal hma­chhawn tur leh, kum hnih chhung chu UPSC exam bak exam dang hma­chhawn lo turin an intiam a ni.

Mizoram aṭangin tun hnaiah UPSC civil service exam-ah tling kan tlem hle a, tun ang zela kan kal chuan Mizo officer lian hi an tlem tawh dawn hle a ni. Hei vang hian sorkar a ṭang a, tlawmngai pawlte leh kohhran thleng pawhin an vei a, UPSC exam-ah Mizo ṭhalai ṭhahnem zawk an tlin theihna turin mahni remchan ang angin hma an la hlawm a ni.

MYC hian theihtawp chhuahin sum leh pai tam tak sengin Mizoram aṭanga IAS an tling nei theihna turin ṭan an la a, an programe hmingah pawh 'Super IAS 40' tia vuahin an tum pawh a chiang hle a ni. Hetiang hming an vuah hi mi tam takin sawisel mah se zirlaite fuihna atan pawh a ṭangkai thei a, tlin phak chiah inrin loh avanga tlanchhiat ngawt ai chuan huaisen taka tum lam chiang taka awm ngam hi a ṭhat zawkna a awm ang.

Sorkar sum senga coaching kala MPSC hnuaia exam hmachhawn leh daih site an lo awm tawh avang leh, mipui aṭanga sawiselna a tam vang pawh a ni mai thei MYC chu UPSC exam ni lo exam dang hmachhawn lo turin a intiamtir ta hial a nih hmel.

A sorkar anga buaipui chûk lo pawha kan tlin theih ṭhin ni si tun hnaia UPSC-a tling kan awm hleithei ta lo hi a veiawm a, sorkar buaipui ngai khawpa kan awm tak avang hian zirlaite'n chonaah ngaiin ṭan la zel rawh se.