Myanmar bungraw phur dan thu

Champhai District Lir­thei Inzawmkhawm Pawl (CPDLIP) chuan Myanmar aṭanga dan loa Mizorama bungraw lut tur leh Champhai aṭanga chhuak turte tiamchin awm loin an dang ṭan. CPDLIP hian Champhai kudam hrang hranga kuhva rah chhêk khâwl sate chu Vairengte thleng zalên taka a kal theihna turin sorkarin hma la se an duh.

CPDLIP thlirna aṭang chuan Myan­mar aṭanga dan loa sumdawnna bungrua lo lut ṭheuh ṭheuh chu inang veka en an duh a, kuhva rah phurh luh an phal lo bîk chu an hrethiam thei lo.

Champhai district chhunga mipui ṭhahnem tak hian kuhva rah phurh hi an lo din chhuahpui tawh a, eizawnna atan an hmang mai ni loin hausakpui pawh mi ṭhahnem tak an awm tawh ang.

Hetihlai hian kuhva rah phurh luh hi, "A ruih theih loh," tih vang ringawta bung­raw lo lut thil dangte nena huang khata khung chi a ni kher lo ang. Tunlai vek hian Hachhek biala kuhva huan siama eizawngtu mi ṭhahnem tak chuan dan loa kuhva rah phurh luh nghawng hi tuarin harsatna lian tak an tawk mêk a, hei vang ringawt pawh hian kuhva rah phurh luh hi chu thil fel ber a ni lo tih a chiang. Hei bakah hian 'smuggling' a nih miau avangin a hlawkna ringawt hmachhuana sawi mawi chi a ni lo ang.

Hetihlai hian dan hnuaiah kuhva rah phurh luh theih dan hi chu a awm a, tun hmaa a hlawk ang em chuan a hlawk tawh lo thung. Chhiah säng tak pek a ngai a, chumi chhiah awl chunga dan ang ni loa kuhva rah phurh luh hi chu sawi mawi chi a ni lem lo ang.

Engpawhnise sorkar hian he harsatna thleng mêk hi a tawn tawnin buk se, huaisen taka dan anga thil a kalpui ngam a ṭha ber awm e.