Kawngpui, PWD leh CYMA

PWD leh Central YMA chuan Mizorama kawngpuite a ṭhat zawk theihna turin thawhhona thuthlung an ziak.

PWD leh YMA hian kawng­pui enkawl chungchangah hian thawhhona an lonei tawh a, chumi aia ṭha zawk leh ṭangkai zawka thawhho theih dan tur an sawiho a ni. Thawhhona hmasaa fuh tawk lo laite siam ṭhat niin thawkho zel turin an inrem a ni.

Kan ramah kawng­pui ṭha kan duh em avang­in sorkar leh tlawm­ngai pawlte an thawk dun hi thil lawmawm tak a ni. Chutihlaiin an thawhho tawhna aṭanga en chuan in duhkhawp lohna a lian a, ṭanlakna tur a la tam hle tih a lang.

State dangah YMA anga pawl ṭha an awm lo chungin kawngpui ṭha tak an nei thei tho a ni. Chuvangin a thawhpuitute lam aiin kawng siamtu hi an pawimawh hmasa tih a chiang. PWD pawhin kawngpui ṭha an duh a, YMA-in a vilpui zui dawn bawk a, heti chunga kan kawngpui hi a la ṭha thei lo cheu a nih chuan engtin nge hma kan lak tak ang?

PWD-in CYMA a thawhpui thei hi a lawmawm viau rual hian kawng lehlama thlir chuan anmahni pawh an inring zo ta lo emaw tih palh mai a awl rum rum a ni. Chutihlaiin inringtawk takin an hna chu enpui an zuam hle ti zawng pawhin a thlir theih tho bawk ang.

Engpawhnise kan ramah kawng­pui ṭha kan neih theihna turin kan sorkar leh tlawmngai pawl lian ber an thawk dun leh ta phawt a. Heti chunga kawngpui ṭha kan la nei lo cheu a nih chuan sorkar leh YMA lam pawhin mawhah an lak ngam ve ve a ṭha awm e.