Zirna in ṭha Mizoramah

National Institutional Ranking Framework (NIRF) in zirna in ṭhaa tehnaah Pachhunga University College chu India rama college ṭha zingah 45-na a ni a, Mizoram University chu university ṭha tehnaah 78-na a ni.

NIRF hi sorkar laipuia Ministry of Education-in zirna sang endiktu tura a ruat an ni a, tehfung hrang hrang an hman zingah zirlai dinhmun zirchianna, university exam result, research kalpui dan, mithiamte'n an hmuh dan leh zirtirtute dinhmun bakah tehna dang ṭhahnem tak a tel. Heng tehnaa mithiam rualin fir taka an teh hnuah Mizoramah zirna in ṭha leh changtlung, ram pum huap pawha zahpuiawm lo kan nei hi a lawmawm takzet a ni.

Zirna ina kan senso hi a tam hle mai a, Mizote'n zirna sang zawk bei tura state pawna sum kan kal chhuahpui hi a uiawm tham hle a ni. India ram khawpui lian chu sawi loh, hmarchhaka khawpui dangahte zirna in panin kan chhuak nasa a, hei hi kan rama zirna inte a ṭhat loh vang leh zirna boruak (environment) kan neih ṭhat loh vangte a ni ang.

Tunah chuan a tehtu rintlakin an tehna hmanga India rama college ṭha ber pawl kan nei thei ta hi hmasawnna lawmawm tak a ni a, he dinhmun an thlen theihna tura thawktute inpekna pawh a chhuanawm hle a ni. PUC-in he dinhmun a thlen theih chuan zirna in hniam zawkahte pawh Mizoramah ngei zirna in ṭha kan nei thei tih a chiang a, kan ramah ngei zirna in ṭha hi pawl hniam aṭanga pawl sang ber thlenga zir theihna din i tum zel ang u.