SEDP hnuaiah vaimím

Mizoram sorkar flagship programme, Socio Economics Development Programme (SEDP) hnuaiah vaimím chî chhungkaw 17,500 vel hnenah sem a ni. Vaimim chi hi National Agricultural Cooperative Marketing Federation of India Ltd. siam a ni a, ip khat Rs 5,851 man niin a inziak a, kg. khat man chu Rs 292.55 tihna a ni. Agriculture department hotute chuan, vaimim chi chu a ipa inziak anga an lei loh thu leh man tlawm zawka an lei thu an sawi.

SEDP hi Mizo mipui tam takin tun kum nga chhunga an nghahhlelh a ni a, mi ṭhenkhat phei chuan dinchhuahna tura an vauchher a ni. Heti taka an ngaih pawimawh chhan chu SEDP ropui taka kalpui tiamtute an sorkar vang a ni a, kum 2018 inthlan hma khan an tlin huna SEDP an kalpui dan tur hi uar tak leh thiam takin an sawi a, an sawina tam takah chuan cheng nuai 3 sem a nih tur thu an sawi lang a ni.

Tuna SEDP hnuaia vaimim chi sem a nih leh tak avang hian mi tam tak chu an thin a rim a, cheng nuai 3 beisei laia vaimin chi an dawng ta mai chu an hrethiam lo. Hetihlai hian sorkar lam chuan vaimim chi ringawt hi SEDP hnuaia kalpui tur ni loin SEDP hnuaia hnathawh tur tam tak zinga pakhat ve mai niin an sawi.

Engpawhnise vaimim chi ṭha-hnem tak sem chhuah a nih tak avang hian kumin chu Mizoramah vaimin kan hnianghnar dawn hle niin a ngaih theih a, mihringin kan ei bakah ran vulhin an duhin an ngeih em em a, hei vang hian SEDP hnuaia vaimim kalpui hi thil sitawm leh sawisel tur chi ni loin thil lawmawm tak a ni a, thil danga an chhunzawm theih phei chuan a lawmawm lehzual ang.