Grape wine-ah Sorkarin hmai hnih nei lo se

Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS) chuan sorkarin grape wine siam leh zawrh a phalsak ngei beiseiin tunlai hian grape an lei khawm leh mek a, lei belh zel turin rua­hmanna an siam.

Mizoram sorkar chuan zu khap burna dan MLP Draft Rules 2022 chu a pawm tawh a, he mi hnuaiah hian grape wine siam leh zawrh hi khap a ni a, hetihlai hian 'inhriatthiam tawnna' hmangin grape wine siam hi kalpui zel a ni. Grape wine siam hi khap a nih loh laiin Aizawl khawpuia grape wine zawrhte chu tun hnai khan mansak an ni lawi a, a siamna lama khap si loa a zawrh chhuah tura miin sum senga an lei khawm sa lo man hi a inmil lo hle a ni.

Tunah hian grape chingtute hi dinhmun laklawh takah an ding mek a, chutihlaiin a leitu lamin an la leisak zel avangin an dinhmun a la ziaawm hret a; nimahsela grape wine zuarte erawh chuan an eizawnna an chân mek a, harsatna namen lo an tawk mek a ni.

Sorkar hian grape wine siam a phal chuan a zawrh pawh phalsak mai se, a phal lo a nih pawhin huaisen takin tilang ngam se, hmai hnih nei ang maia lan hi a fel lo.