Lei chim leh politics

May 27 khan Darlak khaw bula Teirei luia lei (RCC bridge) dawh mek a chim a, a chim chhan PWD-in an sawifiah. PWD lam sawi danin lei a chim lai hian contractor-te'n vên tuma theihtawp chhuah­in tui luanna turte a chim zanah an siam a; amaherawhchu a chim ta tho a ni. 

Mizoramah lei chim kan hre ngun ta hle mai a, lei dawh lai a chim leh ṭhin hi a pawi hle. Mizorama lei dawh hi a dawhtu lam hi contractor an ni emaw, PWD lam an ni emaw, siam zawh hmaa a chim leh mai ṭhin hian mipuiah rin lohna a tuh palh ang tih a hlauhawm a, lei chim thawm reh hun a nghahhlelhawm hle. 

Tlemlai deuh khan lei chim hi kan hre zauh zauh a, nunna chân phah hialte pawh an awm. Khatihlai khan eptu MLA-te kha a hmun thleng hmasa ber berah an ṭang a, lei chima mawhphurtu minister bang turin an au a, department lam thiam loh a awm a nih pawhin a changtu minister chu a thiam lo berah ngaia bang tura an duh thu an aupui nasa hle a ni. 

Tunah lei a chim leh ta a, a chim chhan PWD lam sawifiah­naah chuan khuarel chhiatna nghawng kal zel a nih hmel. PWD insawifiahna hi chu an tih ve tur reng a ni a, ṭhenkhatin an pawm thlap ang a; nimahsela lei a chim ngun zozai tawh em a, hetianga insawifiah hi ring zo tawh lo pawh a awm theih ang.

Engkim mai hi politics nena kaih kawp theih a ni a, kan puh lui duh a nih chuan tunah pawh PWD changtu minister thiam loh tia bang tura nawr emaw, a contract petu lam mawh chhiat emaw thlengin a tih theih ang. Hetihlai hian thil zawng zawng hi politics nena chawm pawlh vek kher lo hian a kalpui theih a, he lei chim siamtu contractor lam emaw, a enkawltu leh viltu PWD lamah pawh thiam lo an awm thei bawk awm e. 

Hun kal tawhah lei chim a ni emaw, thil dangah pawh politics zawnga thil nawr a nih tawh chuan chhui chhuah mumal loh leh hrem tawk pawh awm mang loin thil a zuzi leh mai ṭhin. Tuna thil thlengah pawh hian politics thila hnûk lut kher lo hian, a chim chhan chhuia a rang thei anga siam ṭha leh thuai tura a ṭul anga dan anga hmalak zel mai hi a ṭhat a rinawm.