Ram leilung humhalh duhna

Youth for Environment Justice, Mizoram (YEJM) chuan tun hnai khan Aizawlah ram, leilung leh nungcha humhalhna kawngzawh an huaihawt a; Mizo mipuiin hmasawnna an duh rualin ram, leilung leh nungcha tihchhiat tel an duh loh thu an tarlang.

YEJM chuan, 'leilung, thing leh mau leh a chhunga nungcha, luikawr, tuihna leh luite tichhe thei hmalakna reng reng Environment Impact Assessment (EIA) agency/institution rintlak takin a tih loh chuan kalpui kan duh tawh lo,' an ti a, hei hi ngaihtuah ngun a ngai hle a ni.

Mizoramah chang ni lo khaw­vel hmun dangah pawh hma­sawnna a thlen dâwn chuan environment hian a tawrh châng a awm fo a, hetiang thilah hian inhnialna piah lamah court-a inkhin hial a ni thin.

Hmasawnna duh pawl lamin hmasawn tur chuan a man kan pek a ṭul ve thu an aupui a, hetihlai hian environment humhalh duhtu lam chuan hmasawnna hi environment tichhe lo zawnga kalpui theih dan an sawi ve thung.

Tun hnaia Mizorama kan ngai­mawh ber pakhat chu kawng­pui laihna leivung paih dan mumal lo hi a ni. Hei hian kan thing leh mau nasa takin a tichhia a, nungcha tam takin an thih phah mai bakah lui kuang hial pawh a inthlak danglam a, a nghawng hi a na hle.

Leivung paih vil loha a lo awm reng mai leh, a sawiseltu lam an au chhuah hmaa sorkarin engmah tih a tum lo leh a hmù lo der mai kha a mak takzet a ni.

Tunah chuan ṭhalai lehkha thiam rual, ram leilung humhalh duh tak tak an lo chhuak zel a, thuneitu lam pawhin hei hi hriain fimkhur takin dan angin kal tawh se, mipuiin thil an hre ve a ni tih hi an hriat a hun ta.