Inkharkhip chhunzawm

Mizoramah June thla chhung inkharkhip (lockdown) kalpui chhunzawm a ni dâwn a, inkhar­khip hmasate aiin zawi zawiin inkaihhruaina thlah dul hret hret a ni. Chief Secretary chuan, India ram hmun dang, a bikin Mizoram ṭhenawm state-ahte Covid-19 kai an pun zel thu tarlangin, "State dang aṭangin tangkhangte Mizoramah hruai kîr mek an ni a, chuvangin, Mizoram­ah Covid-19 a darh lohna atan inkharkhip hi June 30, 2020 thleng pawhsei a ṭul tih a ni," a ti. 

Mizoram sorkar thuneitu lam hian state pum huap ngaihtuahin kan ram tana ṭha ber tur an thlir a ngai a, India ram hmun dangah an lo inthlah dul hret a nih pawhin kan state mil tawka thil kalpui ve zel hi a ṭha ang. India ram a zau a, khaw ên leh thim hun ringawt pawh a danglam a, vairam mila curfew hun kalpui zel pawhin harsatna min thlen a, kan tana ṭha tura her rem mai hi thil finthlak tak a ni. 

Inkharkhip hi thingtlang lamah chuan an tawrh dan a ziaawm deuh zawk niin a lang a, mi a loa a feh theih a, a hna ṭul zual a thawh hman chuan buai zualpui chu a pumpelh thei ang. Hetihlai hian khawpuia mirethei zawkin nasa takin an tuar mêk a, thil zuara kal kual ṭhin te, lirtheia ei zawng, mi dawr nghaka eizawngte leh hna hrang hrangah an hna kalpui thei lo hi tam tham tak an la awm reng a ni. 

Hetihlai hian sorkar tán kan zavaia himna tur leh ṭhatna tur ngaihtuah chunga thil kalpui a ngai bawk si a; thlà bi kima hlawh la la zat zat thei sorkar hnathawk tam takin an hriatthiampui phak loh hian khawpuia chhungkaw tam tak hi chu an rûm mêk a ni. 

Inkharkhip hian kan nunah harsatna tam tak thlen mek mah se, inkharkhip loh avangin Covid-19 hri ṭai darh palh ta se, tun aia harsatna lian zawk hi tawk thei kan ni. Sorkarin kan state dinhmun hre chiang a, boruak awm dan thlir chunga June thla chhung inkharkhip a chhunzawm hi kan ṭhatpui ngei a rinawm.