HIV eng tia do tur nge?

Mizoram State AIDS Control Society (MSACS) leh Central YMA chuan HIV/AIDS dona kawnga thawk dun turin inremna an ziak a, district hrang hrang leh thingtlangah nasa zawka HIV/AIDS dona kawnga hmalak an tum.

Mizoramah HIV/AIDS a hluar ta hle mai a, MSACS lam sawi danin khawpui leh thingtlangah he hri hi a darh nasa tawh hle. Ṭhalai zaingah hnathawk tura 'fit' lo an pung zel a, hei hian chhungkua leh ramah retheihna a thlen a, hriselna a tlak hniam mai piah lamah thihna hial a thlen a, a pawi takzet a ni.

Kan ram dinhmun thlir hian mipat hmeichhiatna kawngah kan zalen em em a, hemi rah hi a chhe zawngin kan seng mek tih kan hre ṭheuh ang. He mi piah lamah hian ruihhlo a hluar em em a, tun hnaiah phei chuan ruihhlo hi hlawm liana man a tam a, a man lote nen chhut phei chuan kan ram dinhmun hi a thim hle a ni.

He HIV/AIDS do tak tak tur hian kan ram hi a inpeih a ngai a, tuite emaw kuta daha an do tur bika kan ngaih chhungin kan ramah nasa takin bu a lo khuar hman ta. 'Chhungkuaah i ṭan ang u' tihte hi thil sawi awl tak a nih laiin a taka tihhlawhtlin a harsa em em lawi a, kan ṭanlak dan tur pawh hi ngaihtuah thiam a harsa ta hle a ni.

Tun hnaiah CYMA leh MSACS lamin HIV/AIDS dona kawngah thawhhona an ziak hi a lawmawm a, anni hian uluk takin thawhho dan tur duangin ṭan la se, kan ram dinhmun a chhiat chak em avang hian thapui thawha beih a ngai ta.