Doctor kan beisei dan
MZP headquarters, Kolasib chuan Mizoram sorkar hnuaia doctor zingah Aizawl aṭanga sawn chhuah theih loh an awm chu pawi an tih thu sawiin, doctor-te chu sum leh pai aia Mizo mipui mamawhna dah pawimawh turin an ngen.
Doctor zingah Non Practicing Allowance (NPA) la chunga clinic nei an awm a nih chuan tihtawpsak turin sorkar an ngen a; Kolasib District Hospital-a medical superintendent tur a ruat thar mi paliin an zawm duh loh thute thuchhuahah an tarlang.
Doctor-te hi Mizo mipui hian kan dah sangin kan dah pawimawh hle mai a, hei vang hian an lakah hian beiseina kan nei lianin kan phût sang hle tih a hriat. Tun hnaiah doctor ṭha tak tak tlawmngai leh dik taka thawk duh ṭhahnem tak an awm a, chutihlaiin doctor zingah sorkar aṭanga hlawh la si sorkar hnain a phût anga awm duh lo an awm ṭhin erawh a pawi hle a ni.
Sorkar doctor ṭheuh ṭheuh khawpui aṭanga chhuak ve miah lote pawh a awm theih. Chumi piah lamah chuan sorkarin a sawn chhuah dawna chhuanlam nei thei riau leh sawipuitu nei ṭha pawh a awm theih ang.
Doctor chang ni loin sorkar hnathawk dangah pawh Aizawl pawna kal chhuak duh lo, chhuah dawna chhuanlam siam thiam tak hi chu an awm ṭhin ve reng a ni.
Engpawhnise Mizo mipuiin doctor-te hi kan dah san ang bawkin an lakah kan phût sang hle tih hi anni lam pawhin hria se. Chutihlaiin mihring ve bawk leh tisual ve ṭhin doctor an nihna pawh i hriatsak ṭhin ang u.