Covid-19 chenpui thiam

Mizoramah Covid-19 vei hmuh chhuah thar mi 12 an awm a, heng mite hi state pawn aṭanga tun hnaia rawn hawte an ni a, mipui nawlpui nena inpawh loa khung hran sa an ni a, tunah chuan Zoram Medical College lamah dah an ni. 

Khawvel puma darh tawh hripui laka him reng hi thil theih loh tluk a ni a, hun rei tak chhung Mizoramah Covid-19 hri vei awm mang loa kan awm kha a lawm­awm takzet a ni. Kan him theihna turin sorkarin theihtawp a chhuah a, kohhran a ṭang a, tlawmngai pawlte'n hun, tha leh sum tam tak an seng tawh a, chung zawng zawng piah lamah chuan Pathian venhimna tia sawi loh theih loh a ni ang. 

Covid-19 positive awm loa kan awmlai khan kan minister ṭhenkhat chuan politics zawnga lain kan Chief Minister vanga hima an inngaih thute an sawi chhuak a, a vanduaithlak takzet a ni. Chief Minister chu tu pawh lo ni tehreng se, amah avanga him leh him lo kan ni ngawt lo ang. Kha leh chen Covid-19 positive kan nei lo kha Chief Minister vanga kan puh chuan, tuna positive an awm thar hnu hian kan Chief Minister a la ngai reng a; thil engkima pute tihlawm tum avanga politician-te'n khaw hmu lo leka thu an sawi mai ṭhin hi a zialo khawp mai. 

Tunah chuan state dang leh ram dangte ang bawkin Covid-19 chuan min luhchilh ta tak tak a, tawngpawng hlauh leh chi-ai chiamin awmzia a nei lo a, chutih rualin hlauh loh chi a ni hauh si lo. Covid-19 hripui a lo lut tawh a, a chenpui dan kan thiam a ngai a, mithiamte kaihhruaina zawm chungin, fimkhur takin i awm ang u.