Damlo inenkawlna sum tâng hi
Mizoram State Health Care Scheme (MSHCS) hnuaiah damlote inenkawlna senso bill thehluh tawh, damlote hnena la pêk chhuah loh cheng vbc. 72.15 a awm mek a, chu'ngte chu mi 26,673-te bill a ni.
Right to Information Act hmanga zawhna Health department-in a chhan danin, MSHCS hnuaiah hian sorkar kum kal mek, April 1, 2022 - March 31,2023 atan chhungkua 39,505 an inziak lût a; chutih laiin, kum 2021-22 chhunga damlo bill thehluh tawh zawng zawng la pek chhuah loh vek a ni.
Damlo bill batsakte chu mi 26,763 an ni a, chu'ng zing mi 2,812 chu Covid-19 avanga damlote niin, mi dang 23,861 chu natna dang vanga damlo an ni thung. Covid-19 vanga damlo mi 2,948-te'n bill an thehlut tawh a, chung zinga mi 136 chu pawisa pêk an ni tawh.
Mizoram sorkar sum dinhmun a ṭhat loh avangin MSHCS lama sum bá pawh hi sorkarin a rûl zung zung thei lo hi hriatthiam loh chi a ni lo a, a pek chhuah tur sum a awm miau loh chuan sorkar tán pawh a buaithlak ve bawk a ni. Chutih laiin, he sorkar hnuaiah tho an sum hman dan ṭhenkhat ngaihtuah hian, sorkar hian mi harsa zawkte damlo inenkawlna pawisa pek chhuah hi a ngaihthah tiin a puh theih bawk ang.
Sorkar budget kalphung hi mithiamte'n chîk zawkin an zir a, an sawi zau tawh ṭhin. Tun hma anga hmanna tur bik awm saa sorkar laipuii a rawn theh chhoh ang kha a ni meuh tawh lo a, state sorkarin a ngaih pawimawhah thiam takin a hmang thei niin an sawi. Tunah hi chuan kan sorkar hian mipui mamawh ber ni lo 'construction' lamah sum a hmang na em em a, chutih laiin, a intiam tawh sâ angin MSHCS lama sum bá a pe chhuak thei lawi si lo.
MSHCS-ah hian mipuiin inziah luhna tur sum eng emaw zat an thehlut hmasa a; inziah luhna tur sum an pek tawh hnuah sorkar zawkin a pek ve tur sum a pe thei lo hi sorkar mualphona a ni a, mirethei leh harsa zawkte mai ni lo, dam lohna avanga harsatna tâwk mekte hian puih an ngai hle a ni.