CM thusawi a thlamuanthlak

Chief minister chuan tun hnai khan Zoram Medical College (ZMC) a tlawh a; Covid-19 donaa mamawhte a ṭul anga pek zel a nih thu a sawi a, "Covid-19 do letna atana mamawh hrang hrang chu sorkarin ui loin a ṭul angin a pe zel. Mipui pawh ṭangrualin, Covid fund-ah puih ngaite puihna turin an thawh khawm a ni," a ti. 

Chief minister-in Covid-19 hri len hnua Covid-19 hri kaite enkawlna tura damdawiin bîk a tlawh ta hi a lawmawm takzet a, minister dang leh sorkar official-ten tlawh fo tawh mah se, chief minister meuhin a tlawh hi chuan awmzia a nei ngei ang. 

Tunah hian ZMC hian mamawh tam tak a neih zinga langsar tâk nia lang chu Covid-19 hri kai leh kai lo enna tur RT-PCR a nih hmel a; state pawn aṭanga lo haw an awm belh zel bawk nen hri vei leh vei lo enna hi chu neih belh zel theih ni se a lawmawm khawp ang. 

Kan ramin Covid-19 hri vei kan neih belh zel dâwn nge dâwn lo a sawi theih loh a, tuna kan mamawh chu mi tam zawk endik theihna tur hi a ni. Kan mithiam zawkten khawl rintlak an sawi hi chu sorkar pawhin lei turin ṭan la se, sum indaih lohna karah pawh sum senna tur dik a ni awm e.

Mizoram chief minister-in ZMC a tlawh hi a lawmawm a, mamawh ang zela sum pek zel a nih thu a sawi hi a thlamuanthlak takzet a ni.