Sum enkawl

Reserve Bank of India-in Financial Literacy Week an buatsaih hmanpuitu Chief Secretary Lalmalsawma chuan, sum leh pai enkawl dan dik hriat tawk loh vangin Mizo mipuite'n harsatna an tawh ṭhin thu a sawi.

Mizote hi ziak leh chhiar thiam deuh vek ni mah ila bank kal tlanga sum leh pai enkawlna (banking) lamah hi chuan kan la hnufual hle a, inzir kan la ngai takzet a ni. Hnam dang zingah chuan lehkhathiam lo zawkte pawhin an pawisa khawl leh vawn danah awmze neiin thil an kalpui a, dan ang thlapin an sum neih ang angte an vawng ṭhain an tipung ṭhin.

Mizo zingah erawh chuan leh­khathiam sang deuhte pawhin sum vawn leh enkawl hi an la thiam tawk lo a, bank leh financial institution danga sum peipun leh kawl

ṭhat danah te, loan lak leh a rulh dan kalphungte leh sum chet vel dante hi kan la hrethiam tawk lo hle. Hei vang hian sum leh pai tihpunna awm thei nia lang hi kan bawh huam huam a, lehkhathiam ber berte pawhin awihawm loh khawpa pawisa dah pun theihna 'Chiahpuam' an tih maite pawh an bawh hial a, a zialo hle a ni.

Sum enkawl thiam tur chuan mi incheng vawng tak nih a ngai a, thil chhinchhiah peih leh chhut peih mi nih a ngai a; lehkhathiam sang lem lo tan pawh mi taima tan chuan hengte hi tih theih vek a ni. Keimahni lamin kan hrethiam lo a nih pawhin sum enkawlna kawnga eizawngtu bank lamah râwn mai tur mi ṭhahnem tak an awm reng bawk.

Mizote hian sum leh pai enkawl dan dik kan zir peih a, dan anga sum peipun leh vawn ṭhat hi kan inzir belh zel a ṭul takzet a ni.