Mahni thawh chhuah ni lo it

Disaster & Management department-in an hnathawh thlirlêtna leh inhlan tharna hun an hmana thusawitu DMR minister chuan, department-a thawkte chu fuihin, "Mahni thawhchhuah ni lo sum ît lo a, lungawi leh rinawm taka mahni hna ṭheuh thawh a pawimawh," a ti. 

Mizorama kan buaina lian tak chu mahni thawh chhuah ni lo sum ît tlat an awm ṭhin hi a ni. Hei hi eirukna thlentu lian ber a ni a, kan ram ṭhanmawhbawk tiin a sawi theih bawk ang. Sorkar hnathawk zingah mahni thawh chhuah aia liana khawsa an awm a, sum­dawng zingah pawh uchuak taka hlep insiam ṭhin an awm. Politician zingah pawh contractor ang maia khawsaa hausa thur thur an awm a, contractor leh supplier-te ngei zingah pawh a loa luak­chhuaka hlawk tum an awm avangin kan ram hmasawnain a tuar mek a ni. 

Politician zingah ram tana ṭhahnemngai em em, ram hma­sawnna tur pawisa ît lo ngam, midangte pawh chutiang pawisa ît lo tura fuih ngam an awm hi a lawmawm hle. Chutih rualin kan politician ṭhenkhat, tuna ruling party lama chanvo pawimawh tak tak changtute zingah pawisa ît avanga mualpho mek, eirukna sawia hmeh bel remchang tak an awm erawh a vanduaithlak hle a ni. 

Kan ram hian sorkar chak tak leh remhre tak a nei lo a nih pawhin kan sum hmun ang ang dik taka hmang a, eirukna laka fihlim ṭhiau ram hruaitu chu nei ngat ila heti mai hi chu kan ni lo deuh ang. Ram hruaitu sum thianghlim lo ît lo ngam neih ngawt hi a tawk lo a, mahni hnuaia thawkte pawh dik taka awm tura hrilh ngam leh, mahni department chan hnuaia hnate midang aia ṭha zawka thawk tura contractor leh supplier-te laka inhralh lo hi kan mamawh takzet a ni. 

Kum 2020 kan hman turah hian DMR minister fuihna thu hre reng ila, dik lo taka sum lalut lo turin mahni ṭheuhin ṭan la ila, dikna kawng zawh turin theihtawp i chhuah ang u.