Leivung paiah kan muthlu rei

Mizoram chhunga national highway kawngpui siam enpui tura ruat committee chu tun hnai khan an ṭhukhawm a, National Highways Infra­structure Development Corporation Limited (NHIDCL) leh an hnuaia contractor-te chu leivung paihna tura hmun siam bikah chauh paih turin an hriattir.

Tunlai hian central sorkar lam chuan Mizoram dap chhuakin kawng­pui an siam a ni ber a, hmun hrang hrangah NHIDCL-in kawngpui an lai a, a lawmawm hle a ni. He hmalakna lawmawm tak hi hnathawktute hnathawh danin a zir tak loh avangin mipui tithinrimtu a chang ta hlauh a ni. Hemi phenah hian a hunlaia kawngpui laih vil lotute leh leivung paih mai mai ngaimawh lotu official lam hi an demawm hle a ni.

Tun hnaiah mi ṭhahnemngai leh tlawmngai pawlte an au chhuah hnuah leivung paih vengtu leh viltu turte kan lo nei reng a, national highway siam endiktu committee-te pawh kan lo nei reng a ni. Nimahsela anni lam hian leivung paih a nih hma, kan ram ngaw leh luite suasam a nih hma khan an tih tur lo ti se chu tun ang hian kan buai lo tur a, a pawi takzet a ni.

Tunah chuan kan kawngpui thlang lamte chu leivung paihna hmun a ni deuh vek tawh a, chu chuan kawr tê leh lui luang a tibuai ta a ni. Thing leh mau tam takin an tuar a, a nghawng hi a la chhe dawn hle niin a ngaih theih.

Leivung paih vil chung­changah kan sorkar a muthlu rei deuh a, muhil hlen loa mi ṭhahnemngai leh tlawmngai pawlte'n an sawi harh thei ta erawh a lawmawm hle a ni.