Sum sênna tur dik Covid-19 endikna khawl lei

June 1 zana Covid-19 hri vei hmuh chhuah mi 12 zinga mi 11-te chu a tira endikna rapid antibody test (RAT)-ah an dinhmun a ṭha (non-reactive) vek nia thu dawn a ni; nimahsela a endikna khawl ṭha zawk Reverse Transcriptase Polymerase Chain Reaction (RT-PCR) hmanga endik an nih hnuah Covid-19 an vei tih hmuh chhuah a ni. Health depart­ment chuan, hri hluarna hmun (red zone) aṭanga tangkhang rawn hawte chu RT-PCR hmanga endik vek an tum. 

Covid-19 avangin sorkar a insengso nasa tawh a, sum leh pai din­hmun a ṭhat tawk loh avangin sorkar hna­thawkte hlawh pawh lo hman ṭhen lailawk a tum hial tawh a; nimahsela hetiang dinhmuna kan din tawh hnu hian, Covid-19 hri vei leh vei lo enna khawl RT-PCR tam zawk kan la mamawh belh cheu mai.

State pawn aṭangin kan unaute an rawn haw mek a, a endikna hmasa RAT hmanga endika ṭha vek si; nimahsela chik zawka enna RT-PCR hmanga an endik hnua Covid-19 vei tih hmuhchhuah leh si an awm hian ngaihtuah a tithui hle. RAT hi a lan danah innghahna tlak tak tak a ni lo tih a chiang ta a, state dangah pawh RAT hian sawi a hlawhin ICMR chuan RAT siamtu ṭhenkhatte chu an thil siam a hmantlak lo tiin a lo hnawl hial tawh a ni. 

Sorkar tan mi zawng zawng endik sen a ni hauh lo ang a; nimahsela hun rei tak Covid-19 positive awm loa Mizoram kan awm hnuah state pawn aṭanga lo haw zingah positive thar an awm ta nual si a, a tam thei ang ber RT-PCR  hmanga endik vek hi thil ṭul tak a ni. 

Hri len tirha kan inpekna, ramah tlai­vara kan duty chhan, tun thlenga ramria zan riaka kan mi tlawmngaite an feh chhuah chhan hi Covid-19 hri lo lut thei dona turin a ni. Tunah kan unaute zingah ngei state pawn aṭanga Covid-19 hri lo luhpui an awm tih a chiang tawh si a, sorkar tan RT-PCR khawl tam zawk a rang thei anga lei a, state pawn aṭanga lo haw a tam thei ang ber he khawl hmanga endik hi tihmakmawh a ni. 

Tih tur ṭul tam tak zingah RT-PCR khawl tam zawk lei belh a, tun aia chak zawka test theih dan zawn a, a tam thei ang ber RT-PCR hmanga endik hi thil pawimawh leh hmanhmawhthlak a ni a, sorkar tan pawh sum senna tur dik tak a ni e.