Mipuiin Covid-19 kan pawm a ngai

Mizoramah tun hnaiah Covid-19 vei thar eng emaw zat hmuh chhuah a ni a, state pawna tangkhangte an rawn haw hnuah nitin positive thar hmuh chhuah an awm ta deuh zel a ni. 

State pawna tangkhangte hian an duh vang rengin Covid-19 hi an rawn pu haw a ni lo a, an awmna state-ah a hluar avangin vanduaina an tawk a ni. Hri vang hian state pawn lama kan unaute hi kan en hrang tur a ni lo a, kan zinga mi, he ram neitute tho an ni tih hriain thiam taka kan lo läwm (welcome) zel a ṭha ang. 

Hetihlai hian Covid-19 hi kan ramah a awm tih a chiang tawh a, vawi leh khata tihbo duak theih pawh niin a lang lo a, hun eng emaw chen chu kan chenpui a ngai dawn ta niin a lang. Hei vang tak hian mipui lam hi kan inbuatsaih a, Covid-19 hi kan zingah a awm ve reng a ni tih pawh kan pawm thiam a hun ta. 

Mipui lam pawh positive thar neih belh zel thei dinhmunah kan ding tih kan pawm a ngai a, chumi lo dawngsawng tura kan inpeih a ṭha ang. Tuna an endik chinah heti zat positive an awm a nih chuan, an endik tam deuh hunah positive hi kan nei tam chho deuh dâwn pawh a ni thei a, chumi lo dawngsawng tura mahni lam insiam rem thiam a pawimawh khawp ang.