Vantlangah ṭai darh lo se
Mizoramah a ni telin Covid-19 vei hmuh chhuah belh zel an ni a, tun hnaia hmuh chhuahte hi state pawn aṭanga rawn haw tharte vek an ni. Sorkar thuchhuah tarlan danin an zavai hian quarantine lai an ni hlawm.
"Covid-19 hi a rem dawn tawh lo a, a chenpui dan i zir tawh zawk ang u," tia infuihna leh inzirtirna kalpui ni bawk mah se, mipui leh sorkar pawhin an duh ber chu Covid-19 tel lo a nun hi a ni. Covid-19 a lo luh lohna tur leh he hripui laka kan fihlim theihna tur hian mahni inhremin, mahni insengsoin lockdown khauh tak kan paltlang tawh a, a hlawhtlinna pawh kan hmuin hun rei tak chhung chu Covid-19 hian min tibuai lo angin a sawi theih ang.
Tunah erawh chuan state pawn aṭanga rawn hawte'n he hri hi an rawn luhpui ta si a, hei hi mipui nawpuia a darh lohna tura inven a pawimawh ta takzet a ni. Kha chen kha kan inhremin kan inkhuahkhirh thei a, tuna state pawn aṭanga rawn hawte khung hran (quarantine) hun chhung pawh sei emaw, a ṭul a nih chuan kar hnih-thum khauh zawka inkharkhip kalpui leh hi a ṭha mai lo maw?
He hri hi vantlangah ṭai darh lo se kan duh tak tak a nih chuan, a hlawm liana haw thar an awm vanglai leh an inkhunghran hun (quarantine period) a zawh hma hi chuan khauh deuh zawka inenkawl ngam hi kan himna a ni thei a; mipui vantlanga a ṭai darh palh chuan he state hian a dawl lo ang tih hlauhawm tak a ni.
In vengthawng ṭut ṭut leh mi zawng zawng tihlawm tumna hian hripui hi a ṭai darhtir ang tih a hlauhawm a; min luhchilhtu Covid-19 hripui hi kan rama a ṭai darh lohna turin thutlukna huaisen neih ngam a ṭul.