Sum dinhmun leh ram hruaitute thusawi

Tun hnaiah Mizoram sorkar hnuaia sum pe chhuaktu lian pahnih, Aizawl North leh Aizawl South Treasury chuan sum dinhmun a ṭhat loh avangin sum an pe chhuak lo a, sorkar pisa kài ní-ah ni thum chhung sum an pe chhuak tawh lo.

Sorkar laipui lamin CSS atana sum an rawn pek chhuahte state sorkarin a hman pûk rem ti tawh loin a hmanna tur thleng nghal zat zat turin tun hnaiah thu a pe a, hei hian Mizoram sorkar sum dinhmun hi a nghawng na hle niin a lang. Mahnia sum thawh chhuah nei lo state tán pawh pawisa hman pûk tur a awm chhung chu pangngai angreng taka kal dan a awm a, K deposit lama sum dah leh thil dang chhuanlam hmangin sum tam tham tak hi thil danga lo hman theih dan a awm.

Tunah hi chuan kan state sorkarin sum thawh chhuah tih tham a neih loh avangin harsatna a tawk ṭan mek tih hai rual a ni lo. Sorkar laipui lamin sum vawn leh hman danah kalphung thar a duan hlim a nih avangin state sum bawm a nghing laih pawh hi a mak lo. He harsatna ata state sorkar hian sum dinhmun ṭha taka a siam leh thei a nih chuan a lawmawm ang.

Kan ram hruaitu zingah hmasawnna hi a 'sum' zat zawnga sawi ching an awm nual ta mai hi a vanduaithlak a ni. Hnathawh ṭhat leh ṭhat loh pawh sawi ri lem loa a project man zat sawia mipui hnena sum a tamzia sawi ching kan awm te hi sim theih ni se a duhawm hle.

Hetihlai hian pawisa hman ngei ngeina tur SEDP-a chhung tin hnena cheng nuai thum sem turte kan hotuten an lo tlangaupui nasa tawh si a, an tlangaupui ang zat hi a sem tur lam a awm lo palh mai ang tih a hlauhawm ṭan ta a ni.