Mipui leh sorkar thawhhona

Mizoram sorkar hruaitute, doctor lam aiawh te, tlawmngai pawl hruaitute leh mi pawimawh­te kal khawm chuan Mizoramah lockdown khauh zawka kalpui thar leh an rawt a, state pawn aṭanga rawn haw quarantine hun hman mek chu ni 14 aṭangin ni 21-ah an pawt sei. 

Covid-19 boruaka Mizorama thil thleng lawmawm tak chu mipuiin sorkar an thlawp ṭha ṭhin leh, sorkarin mipui thu leh hla a ngaihven hi a ni. Tun hnaiah Mizoramah a ni telin Covid-19 hri kai hmuh chhuah an pung zel a, test an neih zau deuh hunah phei chuan an la pung zel thei mai thei a, hetiang kara mipui lamin fimkhur thua lockdown kalpui duh thu an theihna hmuna an sawi chhuah te, mithiamte ngaihdante leh pawl hrang hrang hruaitute ngaihdan ngaihchan a ni hi a lawmawm hle. 

India ram state dangte leh khawvel ram ropui zawkah te pawh mipuin sorkar an thlawp ṭha lo a, inkharkhip a hlawhtling lo mai ni loin an bawhchhe lui emaw tih mai tur a ni. Mizoramah erawh chuan mipui hi a rawttuah an 

ṭang a ni mah zawk a, mipuiin an theih angin pawisa an thawh a, khawtlang leh kohhran thlengin an ṭang a, hei hian he hri hlauhawm donaah hian rah ṭha a chhuah ngei a beiseiawm. 

Hri donaah hian kan zavaiin ṭang tlang zel ila, ṭhahnemngaih luat avangin kan do duh dan inang chiah ṭhin lo mah se kan do a thuhmun a ni tih hre chiang ila, Covid-19 donaah mipuiin sorkar i thlawp zel ang u.