Inkharkhip khauh zawk

Chief minister hoa tun hnaia mi pawimawh ṭhukhawm chuan, Mizoramah chawlhkar hnih chhung khauh zawka inkhàrkhip (total lockdown) an rèl. Total lockdown hi Thawhṭan zan zanlai khan kalpui ṭan a ni a, a inkaihhruaina dan erawh chu Thawh­lehni zing dar 1:30 khan tihchhuah a ni. 

Mizoramah a ni telin Covid-19 kai hmuh belh zel a ni a, tun hma zawng aiin kan dinhmun hi a ṭha lo zual tiin a sawi theih awm e. Hei vang hian kan sorkar hruaitute, kohhran leh pawl hrang hrang aiawhte'n khauh zawka inkharkhip kalpui an duh pawh hi thil mak a ni lo. 

Inkaihhruaina en hian sorkar hian thil thui tak a dawn tih a lang. Covid-19 kai tharte hi state pawn aṭanga lo hawte an nih avangin ram puma khauh taka inkharkhip ai chuan, quarantine-na hmun awm tamna khawpui lam an hrut na deuh tih a lang. Hripui avanga harsatna kan tawh rual hian, ei leh bar tlakchham avanga harsatna dang tawk thei reng kan nih avangin thingtlang lamte fehna hun remchang siam hi thil finthlak tak a ni. 

Sorkarin inkharkhip khauh zawk a rawt hian, mipui nawlpui kan chhuah huai huai lohna tur leh, kan buaipui mek hri a darh zel lohna tura tih a ni a, mipuiin hei hi kan man thiam a pawimawh hle. Sorkar hian min khuah­­khirh hrim hrim hi a tum lo a, mimal tinte kan himna turin rua­hmanna a siam mai a ni rih a, kan pawm thiam a ṭha hle. 

Sorkar leh khaw­tlangin inkaihhruaina dan te siam mah se, a pawimawh ber chu a zawmtu leh bawhchhe theitu mipuite tho hi kan ni. He inkharkhip hi 'ka' himna tur a ni tih hria ila  tute emaw thu kan va zawmsak leh kan bawhchhiatna lamah ngai loin, mahni sahimna tur ngaihtuah ṭheuhin, Mizoram mipuite'n sorkar inkharkhip ruahmanna thar hi i zawm ang u.