Zirna inah ruihhlo

Mizoram Social Defence & Rehabilitation Board, Social Welfare & Tribal Affairs department leh National Institute of Social Defence, Ministry of Social Justice & Empowerment-te chuan tun hnai khan Aizawl North College-ah ni khat awh ruihhlo laka invên dan zirna, 'Awareness Programme on Drug Abuse Prevention’ an buatsaih a, ruihhlo hlauhawmzia leh a inven dante zirtir a ni a, zirlaite ruihhlo ti lo turin an intiam bawk.

Mizoramah ruih­hlo a zalen hle mai a, tun hnaia ruihhlo an man pawh a tam tham hlawm hle a ni. Kan ram dinhmun dik tak kan en chuan ruihhlo hian thuk takin min rûn mêk tih hai rual a ni lo a, tun hnaia a hlawma ruihhlo lo lut pawizia hi kan la hre dâwn chauh niin a lang.

Ruihhlo ti tawhte simtir harsatzia pawh a ram pumin kan hre tawh a, ruihhlo lo lut tur dan harzia pawh kan hre tawh. Hei vang hian ruihhlo la ti ve lote venhim hna hi theihtawp chhuaha kan beih tlan a ngai a, kan zavaia kan ṭan lakna tur a ni ang.

Zirna ina ruihhlo ṭhat lohzia zirtir tel hi thil ṭul tak a ni tawh a, a bikin naupang zawkte hnenah tun aia zirtir uar hi a pawimawh hle a ni. 'Mahni chhungkua ṭheuhah inzirtir a pawimawh,' ti ṭhin mah ila, chhungkaw dinhmun hi a inang lo viau a ni. Tunlaia naupang tam tak hi ruihhlo ti ṭhin fate an nih nawk tawh avangin chhungkuaa inzirtir thei lo hi mi tam tak an awm dawn a ni.

Hei vang hian primary school-ah hian tun aia uar zawkin ruihhlo hlauhawmzia zirtirna hi kalpui ni se, an kum mil zelin mithiamten zirtirna kalpui se, kan ram dinhmun ngaihtuah hian thil ṭul ber pakhat a ni ta.