Zirtirtu lak belh leh zirna quality

School Education Minister chuan sorkarin zirna a ngaih pawimawh thu leh zirtirtu ṭhahnem tak lak belh an nih thu sawiin, "Department dang thik tham khawpin sorkarin a ngai pawimawh a, thawktu lakte pawh 2,500 chuang an ni tawh. IV grade ringawt pawh 50 chuang lak an ni tawh," a ti.

Sorkarin edu­cation ngai pawi­mawha sorkar sikula thawktu tur a lak belh zel hi thil lawmawm tak a ni a, hei hian zirna quality tiṭha sawt thei se a lawmawm lehzual dawn a ni. Mizoram sorkarin sum a indaih loh em em laia zirtirtu post ruak hnawhkhah chhoh zel a ni hi a lawmawm a, hei hian rah ṭha a chhuah ngei pawh i beisei ang.

Zirtirtu lak tur hi quality sang leh thiam tak tak ṭhahnem tak an awm tawh a, ṭhangthar lehkhathiam mai ni lo ṭawng thiam leh hawiher zau tak tak an awm tawh a ni.

Sorkarin thawktu 2,500 zet a lak tharte hi mi tling, ṭha leh thiam tak tak an nih chuan zirna hawiher pawh thlak danglam daih tham an ni a, an thawhna sikulah a ṭha zawnga danglamna a awm lem loh erawh chuan awmze nei loin sum kan seng thlawnah a ngaih theih dawn a, a pawi hle ang.

Kan rama zirna siam ṭhaa kan kalphung dik lo laite tidik thei tur chuan zirtirtu ṭha kan neih a pawimawh a ni. Tun hmain thawktu lakah induhsakna hleihluak tak avangin politicvs rimnama zirtirtu lak a awm ṭhin tih phat rual a ni lo a, tunah pawh 'inpe pui banna' tih lehkhate kan la ziak lang ngam kha a pawi hle a ni.

Thawktu lak belh aṭanga teh hian zirlai pawh neih belh theih ni se, hei hian zirna quality ṭha keng tel bawk se, kan ram zirnain hmasawnpui ngei se a lawmawm ngawt ang.