Khauh taka kal a hun e

Lockdown 6.0 kaihhruaina khauh taka kalpui dan tur ngaihtuahin Home minister hoin tun hnai khan sorkar hotute an ṭhukhawm a; páwna chhuah tlem chungchang veng tin local task force-te van­tlang aurinnaa autir leh duty-na hmun hrang hrangah police flying squad ruat belh an rél a. Police lamin lirtheia chhuakte pawh uluk takin endik se, an ti.

Tun hnaiah Mizo­ramah Covid-19 vei hmuh chhuah belh zel a ni a, hei vang hian sorkar pawhin lockdown kalpui pangngai duhtawk loin 'total lockdown' a puang ta hial a ni. Chief minister hoa mi pawimawhte ṭhukhawmin total lockdown nei tura an puan tirh khan mipui lam chuan lockdown hmasa ber anga khauh taka engkim khuahkhirh tur angah an ngai niin a lang a; nimahsela sorkar hotu lamin kan ram ei leh bar lamin a tawrh lohna tur leh, sorkar pisa hnathawh a buai lohna turin kan ram milin ruahmanna an siam. 

Sorkarin inkaihhruaina a siam a, chhuak thei leh thei lo chinte fel taka siam a ni a, a kenkawh lamah sorkar an ṭan a ngai. Dan siam hi thil harsa tak a ni lo a, a kenkawh hi a harsa zawk leh taimak chhuah a ṭulna zawk a ni a, tun hun rei lo te kan 'total lockdown' leh chhung na na na hi chu chawl loa police duty indah a, local task force-te nen ṭang kawpa ṭan lâk mar a ṭha khawp mai. 

Covid-19 hri vei kan neih tharte hi state pawn aṭanga tun hnaia rawn haw vek an la ni a, mipuia a darh lohna turin tun hi inven hun a ni a, chumi atana ruahmanna a siamte bawhzui a, khauh taka vil zui hi sorkar mawh a ni. Tun hnai kar hnih chhung vel hi chu sorkar pawh khauh takin han ṭang mar leh se, mipuite pawhin theihtawpin i ṭawiawm ang u.