Home Quarantine
Mizoramah hripui vei mek mi 101 hmuh chhuah tawh zingah inkhung hran hun (quarantine peroid) zo tawh mi pahnih an tel a, home quarantine hmang zinga mite pawh eng emaw zat an awm bawk. Tun hnaia chief minister hoa mi pawimawhte ṭhukhawm chuan loh theih loh thilah lo chuan home quarantine kalpui tawh loh an rawt a ni.
Home quarantine zingah Covid-19 positive hmuh chhuah an nih avangin an awmna khua leh veng an chiai hle a, an ṭhenawm vengte thlengin home quarantine kalpui hi an sawisel. Mipui nawlpui pawhin in lama inkhung hran hi a him tawk loa ngaiin an sawisel bawk a ni.
Hetihlai hian home quarantine hi a hranpaa dem leh sawisel chiam tur a ni ber lo a, sorkarin home quarantine kalpui a phal chhan hi sorkar laipui lamin an phal vang a nih hmel. Dan dik taka fimkhur taka kalpui chuan mahnia inkhung hran (home quarantine) hi a huhoa khung (community quarantine) ai chuan a him zawk tura ngaih a ni a, chumi piah lamah sorkar tan insenso ngai loa kalpui theih a ni bawk.
Mipuiin an sawisel leh an duh loh chhan chu home quarantine-a awmte'n dan angin thil an kalpui lo a, dan an bawhchhiat avangin an ṭhenawm khawvengte a tiralkhel hle a ni. He hripui kan hmachhawn mek hi kan zavaia ṭangruala beih chi a ni a, thu awi lo leh dan zawm lo pahnih khat avanga a ram pumin a tawrh theih a nih avangin home quarantine kalpui tawh loh hi mipui lam chuan an duh zawk ngei ang.
Chutih rual chuan rinawm taka home quarantine kalpui thei an awm chuan midang nena inchen pawlh loh hi a him a, Covid-19 hi Mizoram thlen hnu quarantine centre thlenga inkaichhawn theih a nih vang hian a him ber pawh sawi thiam a harsa hle.
A pawimawh ber chu mahni ṭheuh kan rinawm a, kan intiam anga dan dik taka kan inkhung hran hi a ni a; home quarantine kan kalpui tawh lo a nih pawhin, a huhoa kan inkhungnaah pawh hian fimkhur thei ang bera kan kal a ṭul takzet a ni.