Sorkar chet dan leh hlawh pûk

Covid-19 avanga sorkar sum indaih loh phuhrûkna tura Mizoram sorkarin a hnathawkte hlawh a pûk dan kal hmang chu Finance department chuan a tifel ta. Thla khata Rs. 40,000 hlawh tling lote chu puksak an ni dawn lo a; hlawh puksak turte hian Rs. 40,000 aia tlem lo hlawh an lak theih dan turin ruahmanna siam a ni. 

Mizoram sorkar sum dinhmun a ṭha lo ta takzet a, ama hnathawkte hlawh ngei a puk a lo ṭul ta hial mai. Hemi kawngah hian kan state sorkar hi dem leh sawi chhiat tur a ni lo a, hripui lêng avanga khawvel buai tuartu zingah a tel ve a ni mai a; nimahsela mahni hnathawkte hlawh puktu sorkar chet danin a che zui em, tih hi mipuiin an enzui tur chu a nih hmel. 

Tunah hian sorkarin sum tam tak a senna SEDP Board 14 a awm a, heng board-ah hian hnathawktu a hranpaa lâk vek a ni. Sorkar hnathawk kan mamawh aia tam kan nei tia an sawi khawpa sorkar hnathawk awm tamna state ni chung a, a thawk sate ring zo lo ang maia mi thar lâk hi sum neih loh lai chuan a inhmeh lo hle. Sorkar department hrang hrang awmin a enkawltu minister an awm vek chunga board hranpa siam leh hi sum khawhralna angah a ngaih theih. 

Sorkar lam chuan hmasawnna tura sorkar ruahmanna kal meka sum hman hi Covid-19 sum nen thil thuhmun ni lo angin sawi mah se, sorkar hnathawk hlawh pawh hi Covid-19 dona tur sum a ni hauh lo a, a ṭulna avangin an pawt zawk mai dâwn a ni. Hei vang hian SEDP Board sum a ni emaw, chumi hnuaia mau chinna tur sum a ni emaw, PAHOSS sum leh construction work thawhna tur contract sum hrang hrangte pawh hi Covid-19 dona atana pawh theih loh a nihna a awm bîk dâwn em ni? 

Covid-19 dona atana sorkar hnathawkte hlawh liau liau puk/bat ṭhensak an nih tawh chuan, sorkar pawisa dang hmanna hi mipui hian an chhinchhiah ve kauh kauh dâwn a ni.